ماء الورد من أقدم وسائل العناية بالبشرة المتوارثة من قديم الأزل، وأشهر استخداماتها هي إنك تخلطيها مع ماسكات أو تمسحي بيها بشرتك، بس فيه 5 فوائد تانية لماء الورد عمرك ما جربتيهم: لإزالة المكياج: مش هتلاقي أحسن منها تمسحي بيه مكياجك، اخلطيها مع زيت جوزهند وامسحي بيهم المكياج وهتلاقي بشرتك مش بتشد ولا مجهدة بعد ما تشيليه. قابض للمسام: المسام الواسعة مشكلتنا كلنا، هاتي علبة التلج اللى بتجمدي فيها السوائل فى الفريزر وحطي فيها ماء ورد، استخدمى مكعب التلج ده كمساج على بشرتك لمدة 5 دقائق وسيبيه ينشف لوحده، هيرجع المسام لطبيعتها وهينشط الدورة الدموية. سبراي للنضارة: لو عندك إزازة برفيوم خلصت، حطي فيها ماء ورد وخليها فى شنطتك، لما تحسي بلمعان فى بشرتك أو إجهاد على مدار اليوم، رشي عليها ماء ورد وامسحيها بقطنة علشان ترجعلك نضارتها. للعين: لو عنيكي مجهدة أو فيها إنتفاخات، حطي ماء ورد على قطنة وسيبيها على عنيكي لمدة 10 أو 15 دقيقة، هتقلل الإنتفاخات أو الإحمرار وهتمسح أي بواقي مكياج فيها. للشعر: لو حطيتى كمية بسيطة من ماء الورد فى الشامبو أو بعد ما خلصتي غسيل شعرك بالشامبو وشطفتيه بماء ورد بسيط، هتلاقيه بقى ناعم وطري كأنك استخدمتي بلسم.
إضافة تعليق